नवी मुंबई शहरात करोना रुग्णांची संख्या दिवसेंदिवस वाढत असून रविवारी या संसर्गाने ७२ वर्षीय व्यक्तीचा मृत्यू झाल्याने हे सावट अधिकच गडद झाले आहे. रविवारी करोनाचे आणखी तीन रुग्ण आढळले. यामुळे एकूण रुग्णांची संख्या २८वर पोहोचली आहे. करोनामुळे शहरात पहिला मृत्यू झाल्याने नागरिकांमध्ये भीतीचे वातावरण आहे.
रविवारी आढळून आलेल्या तीन करोनाबाधित रुग्णांपैकी नेरूळ येथील एका ७२ वर्षीय व्यक्तीचा मृत्यू झाला. या रुग्णाला हृदयविकाराचा त्रास झाल्याने प्रारंभी बेलापूर येथील ज्ञानेश रुग्णालयात उपचारासाठी दाखल करण्यात आले, परंतु प्रकृती अधिक खालावल्याने त्यांना कोपरखैरणे येथील रिलायन्स रुग्णालयात दाखल करण्यात आले. त्या ठिकाणी त्यांच्या स्वॅबची करोना चाचणी केली असता त्याचा अहवाल पॉझिटिव्ह आला. हा अहवाल येण्यापूर्वीच त्यांना मृत्यूने गाठले. दुसरा रुग्ण नेरूळ सेक्टर-२८ येथे यापूर्वी आढळून आलेल्या एका करोनाबाधित कुटुंबातीलच आहे. या कुटुंबातील करोनाबाधितांची संख्या चार झाली आहे. या कुटुंबातील पहिले तीन रुग्ण माहिम येथील एस. एल. रहेजा फोर्टिस रुग्णालयात उपचारासाठी दाखल झाले. त्याच कुटुंबातील ७० वर्षांच्या गृहस्थांना तेथे उपचारासाठी दाखल केले जाणार असल्याचे महापालिका सूत्रांनी सांगितले.
यापूर्वी नवी मुंबईत करोनाच्या संसर्गामुळे मृत्यू झालेल्या दोन्ही व्यक्ती या नवी मुंबई क्षेत्राबाहेरील होत्या. त्यामध्ये एका फिलिपिन्स नागरिकाचा समावेश होता. या फिलिपिन्स नागरिकाच्या मृत्यूनंतर प्राप्त झालेल्या वैद्यकीय तपासणी अहवालानुसार त्याची करोना चाचणी निगेटिव्ह आली होती. करोनामुळे मृत पावलेली दुसरी महिला ही गोवंडी येथील राहणारी होती. ती अन्य आजारांवर उपचार घेण्यासाठी नवी मुंबईतील डी. वाय. पाटील रुग्णालयात दाखल झाली होती. या महिलेच्या करोना चाचणीचा अहवाल नवी महापालिकेला प्राप्त होण्यापूर्वीच तिचा मृत्यू झाला. त्यामुळे रविवारी कोपरखैरणे येथील रिलायन्स रुग्णालयात मृत पावलेली ७२ वर्षीय व्यक्ती ही नवी मुंबईतील करोनाचा पहिला बळी ठरली आहे. दिवसेंदिवस नवी मुंबईतील करोनाग्रस्तांच्या संख्येत वाढ होत असल्यामुळे नवी मुंबईत चिंतेचे वातावरण निर्माण झाले आहे.
