सीपीआरच्या इतर पेशंटना मोफत उपचार पुरवा

छत्रपती प्रमिलाराजे रुग्णालय सीपीआरच्या क्षमता पूर्ण झाल्यानंतर करोनाग्रस्त रुग्णांसाठी डॉ. डी. वाय. पाटील रुग्णालय वैद्यकीय सेवा देणार आहे. करोनासाठी सीपीआर राखीव केल्याने या ठिकाणी येणाऱ्या इतर रुग्णांवर सीपीआरप्रमाणेच मोफत उपचार करण्याची तयारी शहरातील खासगी रुग्णालयांनी उचलली आहे. राज्यातील आरोग्य सेवेसाठी हे प्रेरणादायी असल्याचे पालकमंत्री सतेज पाटील यांनी सांगितले. जिल्हाधिकारी कार्यालयातून पालकमंत्री पाटील यांनी व्हिडीओ कॉन्फरन्सींगद्वारे खासगी रुग्णालयांच्या डॉक्टरांशी संवाद साधून चर्चा केली.

पालकमंत्री पाटील म्हणाले, 'पहिल्या टप्प्यासाठी सीपीआर आणि सीपीआरच्या रुग्ण क्षमतेनंतर दुसऱ्या टप्प्यासाठी डॉ. डी. वाय. पाटील हॉस्पिटल करोनाग्रस्तांसाठी वैद्यकीय सेवा देणार आहे. डी. वाय. पाटील विद्यापीठाचे कुलपती डॉ. संजय पाटील यांनी त्यास मान्यता दिली आहे. तिसऱ्या टप्प्यात शिवाजी विद्यापीठातील वसतिगृहांचा वापर केला जाईल. खासगी रुग्णालयांकडे उपचारासाठी येणाऱ्या रुग्णांमध्ये करोना संशयित लक्षणे आढळल्यास त्यांना थेट सीपीआरला पाठवावे. तसा रुग्ण सीपीआरला जाण्यास मनाई करीत असल्यास पोलिसांना तत्काळ कळवावे. शासनामार्फत आपणा सर्वांना आवश्यक ते सहकार्य केले जाईल.